Ang Pagkilala Sa Baybayin-Tagalog


Bago ko makilala ang Baybayin


Sa ika-tatlong taon ko sa kolehiyo, kasagsagan ng usapin tungkol sa pagpalit ng wikang Tagalog (o Pilipino) nang wikang Koryano bilang elective subject sa kolehiyo na isa lamang palang hindi pagkakaunawaan (tunghayan ang iba pang mga detalye rito sa YouTube video ni El ng EL's Planet na 'CHED is not replacing Filipino with Korean'), ay nakilala ko ang isang paraan ng pagsulat ng mga sinaunang Tagalog, ang Baybayin.

Noong mga panahong iyon ay kakatapos lamang ng ika-unang simestre ng school year 2018-2019 kung saan may dalawa akong free elective subjects na patungkol sa mga wikang banyaga, ang mga wikang Hapon at Koryano. Sa halip na wikang Koryano ay wikang Espanyol dapat ito ngunit bago pa mag-Mid Term exams ay napalitan ang aming guro na ang wikang ito lamang ang pwede niyang ituro.

Nahirapan ako sa wikang Hapon, madali itong ibigkas ngunit mahirap isulat at matandaan ang mga simbolo upang mabasa. Samantalang kabaligtaran naman sa wikang Koryano. Nadaliaan akong tandaan ito upang isulat at basahin. Ang wikang Espanyol naman ay sadyang madali na lamang sapagkat ang wikang Pilipino ay may impluwensya na nito.

Ang pagkakilala ko sa Baybayin


Habang naghahanap ako ng panunuorin ko sa YouTube ay nakita ko ang video ni Kirby Araullo na 'Alam Mo Ba? Ang Baybayin'. Pinanuod ko ito at ang ilan pang mga panunuorin tungkol dito. Mula noon ay nagkaroon na ako ng interes sa Baybayin. Ika-11 ng Nobyembre taong 2018, wala pang isang oras ay madali kong natutunang magbasa at sumulat ng Baybayin sa tulong na rin ng mga workbook ni Kristian Kabuay (maaari mo itong ito kuha sa 'Downloads - Baybayin').

Matapos kong makilala ang Baybayin


Sa totoo lamang, ako ay isang taong walang interes sa sarili niyang bansa. Ang ibig kong sabihin ay wala talaga akong interes sa kasaysayan ng Pilipinas. Ngunit nang makilala ko ang Baybayin ay nagbago ang lahat. Nais ko na naipaalam din sa lahat ang tungkol sa Baybayin at iba pang mga pamamaraaan ng pagsulat sa Pilipinas. Hanggang ngayon ay nag-aaral pa rin ako tungkol dito.

__________________________________________________________
Sa aking susunod na blog post ang aking ikukwento naman
ay kung papaano ko nakilala ang sulat ng mga Tagbanwa
o Palawan, isang sulat din ng mga sinaunang Pilipino.

Comments