Ang Pagkilala Sa Baybayin-Tagbanwa

Sa aking huling blog post, ikinuwento ko kung papaano ko
nakilala ang Baybayin, ang sulat ng mga Tagalog. Ngayon
naman, sa ikalawang yugto, ang sulat naman ng
mga Tagbanwa o Palaw’an ang ikukwento ko sa inyo.
__________________________________________________________


Bago makilala ang sulat Tagbanwa


Nang matutunan ko ang pagsulat ng Baybayin, nais ko itong tutukan. Kulang pa ang nalalaman ko tungkol dito kaya ito lamang ang writing system na inaalam ko. Nang malaman kong may iba pa bukod dito ay hindi ko pinansin sapagkat ang mga sulat na ito ay iba ang lenggwaheng ginagamit. Noon ang pagkakaakala ko ay ang Baybayin ay para lamang sa wikang Tagalog.

Ako ay laking Maynila ngunit ngayon dito na ako sa Palawan naninirahan kaya’t ninais ko ring malaman ang kanilang sulat, ang Tagbanwa o Palaw’an. Ngunit hindi ako marunong ng kanilang salita kaya kung aaralin ko ang kanilang sulat ay wala ring halaga sapagkat hindi ko rin ito magagamit.

Pagkilala ko sa sulat Tagbanwa


Nang medyo nagsawa ako sa Baybayin ay sinubukan ko ang sulat Tagbanwa.

Sa aking pagsasaliksik ay nakita ko ang 'Tagbanwa Alphabet With Some Reforms Proposed' ni Norberto Romuáldez. Marso taong 2019 noong binasa ko ito at natutunan ko ang pagsulat ng Tagbanwa. Ngunit ito ay reformed version na. Kahit na ganoon ay nagustuhan ko rin ito tulad ng Baybayin, ngunit gusto ko munang matutuo ng tradisyonal na pamamaraan ng pagsulat nito. Ngunit ayon dito Bisaya ang lenggwaheng ginagamit sa Tagbanwa kaya medyo nalungkot ako dahil hindi ako marunong magsalita nito.

Ilang linggo ang nagdaan ay pumunta ako sa The Palawan Museum. Noong nag-field trip kami dati, natatandaan kong may nakita akong parang Baybayin doon kaya ako pumunta. Mali ako dahil ito pala ay ang sulat Tagbanwa o Palaw’an.

Sa iba pang mga nabasa ko, nalaman kong maaari palang gamitin ang Baybayin o di naman kaya ay ang Tagbanwa sa kahit anong lengguahe o dayalekto na nasa Pilipinas. Natuwa ako ng malaman ito kaya ginamit ko na rin ang Tagbanwa sa Tagalog.

Matapos kong makilala ang Tagbanwa


Tulad ng Baybayin, matapos kong matutong sumulat ng Tagbanwa, nais ko pang matuto ng tungkol dito at i-practice ito araw-araw. Sa talaarawan ko nga sulat Baybayin o Tagbanwa na ang ginagamit ko. Napaka dali lamang matutong sumulat ngunit ang pagbabasa ang mahirap. Para akong bumalik sa pagkabata kung saan nagsisimula pa lamang akong magbasa, paisa-isa ang pagbasa ko ng mga pantig. Matatawa ka na lamang. Kaya hanggang ngayon ay patuloy ako sa pagsusulat at pagbabasa ng Baybayin at Tagbanwa.

Comments